| al.ways.map | 呢個名緣自於我的圖像日記

由細到大，我都係一個好多情緒，但又唔識抒發嘅人。最後就會積積埋埋，變得內耗傷身。而修習身心靈咁多年，呢個一直都係我幾卡關嘅一件事，搵唔到可以幫助自己抒發同放下情緒嘅方法。
.
直到2023年10月某一日，同朋友行完巿集去食晚飯，沿途閒聊間，朋友建議我可以試下做「圖像日記」。「圖像日記」呢個名係我作嘅其實係好似寫日記咁，將每日所思所想，所見所聞，貼/寫落去。例如今日抽咗隻牌，可以影張相印出嚟，又或者成張牌貼上去見到一啲inspirational quote/開心唔開心嘅情緒感受，都可以寫低落本日記度。
.
我用嚟做「圖像日記」嘅，係好多手作人都會用嘅Travel log小本子，而我更將佢命名為「Al.ways.map」。
.
雖然叫做「日記」，但我係一個無乜堅持嘅人，所以最初我都同自己講，唔使日日寫，咁就會無咁大壓力易啲堅持。
.
但估唔到 Al.ways.map 唔單止幫我記錄咗好多日常生活瑣事，仲幫我疏理到唔同嘅思緒同情緒，記低咗之後，我個人係慢慢更多清晰，亦都好似清空咗個容器咁，有更多嘅capacity去承載生活中新加嘅人事物同感受。
.
去到今日，我希望將 al.ways.map 嘅意義進一步推展，與更多人分享同交流，如何由小時候體弱心累嘅我，逐步在身心靈的路上，讓生活變得更自在快樂。同時，亦希望更多人同我一樣，搵到適合自己嘅方式，去活出自己嘅人生。
.